الرئيسية / منوعات / جاي منين …
جاي من هناك

جاي منين …

الشاعر/ عبد الناصر البنا
جاي منين
أنا ؟ أنا جاي من زمان
زمان
من قبل انت ماتتولد
بنت وولد
والطيارات ف السما
غاره
بترمي علبة القلم الرصاص
علي حاره
ولادها ماتعرف إلا
صوت ا لكمنجه اللي بتعزف
ف الراديوهات
والأمهات
بتفصل عروسه قش للبنات
وحصان خشب للوله
أبو مريله
والراجل
اللي بيصلي ويتصنت
للشيخ محمد رفعت
ولما تعلن
ساعة الجامعه
ان الساعه بقت سبعه
تلقاه يمد في خطوته
لجلن مايلحق ورديته
وده أصله راجل ف العمل مخلص
وقبض الشهر قبلما ييجي بيخلص
لكنه عمره ما ييأس
بيقول يارب
عيوشه لما تسأله
هنجيب منين
بيقولها : قولي يارب
وهي ماسكه توبها القديم وبتغسله
وبنطلونه اللي اتقطع
وعمل رقع
بتخيطه وبتعدله
وتقول يارب
جاي من زمان….
عيوشه واخده الدنيا حرب
ومن وهيه صغيره
زي الألف
مزروعه جوه غيطان
جنان من غير سُقُف
زي الألف
الريح تهزه تقع تقف
وأم عثمان (أمهاعلمتها
اللقمه لما تكون حاجتها
تمد ايدها
جوه حنك السبع
وتشدها
ولو انت سبع
شدها
مش أي حاجه تهدها
دي النخله لما تهزها
م التمر تملا حجرها
من تحتها
خرخ المهندس والمحاسب والمحارب
والتجارب
علمتها
كل حاجه جوه بيتها
مليانه حب
تعلي صوتها
وتقول بكل قوتها
الف حمد والف شكر ليك يارب
عيوشه كانت نهر حب
يارب إرحمها يارب

شاهد أيضاً

انشاء صور زجاجي لحماية برج ايفيل !

قررت بلدية باريس انشاء صوَر زجاجي حول برج إيفيل بارتفاع مترين ونصف المتر وذلك لحماية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *